Edhe pse për shkak të temperaturave të larta ditëve të fundit që na kanë bërë të ndihemi sikur jemi futur në stinën e pranverës, sot më 22 mars mund të themi zyrtarisht që jemi në pranverë.
Sot dita dhe nata do të jenë të barabarta, për shkak të ekuinoksit pranveror. Ky fenomen do të nisë orën në 10.28 minuta.
Dita e parë e pranverës do të zgjasë 12 orë e pesë minuta. Dielli do të lindë në orën 5 e 39 minuta, ndërsa do të perëndojë në 17 e 44 minuta.
Kjo datë konceptohet ndryshe në vende të caktuara në botë.
Për shqiptarët fillimi i pranverës e ka qenë i lidhur me tokën dhe punët e bujqësisë, për turqit është një festë familjarë, për Iranin është dita e parë e vitit.
Ajo simbolizon jo vetëm ardhjen e stinës së pranverës por edhe rigjallërimin e natyrës. Kafshët zgjohen nga gjumi dimëror, pemët çelin sythat dhe bimësia gjallërohet. Çdo gjë nis të marrë jetë dhe gjallëri.
Çfarë është ekuinoksi?
Ekuinoksi në astronomi është ai çast kohor (jo një ditë e plotë) kur qendra e Diellit mund të vëzhgohet drejtpërdrejtë sipër ekuatorit tokësor, rreth 20 marsit dhe 23 shtatorit të çdo viti. Në këto dy data, dita dhe nata janë të barabarta, secila nga 12 orë. Gjatë barasnetëve, dielli lind saktësisht në lindje dhe perëndon me saktësi në perëndim.
Në hemisferën e veriut, barasnata e marsit (që ndodh më 20 apo 21 mars) është barasnata e pranverës (ekuinoksi i pranverës) dhe barasnata e shtatorit (që bie më 22 apo 23 shtator) quhet barasnata e vjeshtës (ekuinoksi i vjeshtës).
