Zv/ministrja në detyrë e Drejtësisë, e cila në qeverinë e re do të jetë ministrja e Drejtësisë, ka deklaruar se mosfunksionimi i sistemit të drejtësisë është shkaku kryesor për vrasjen e gjykatëses së Shkodrës Fildes Hafizi.
Përmes një reagimi dërguar mediave, Etilda Gjonaj thotë se sistemi duhet të pastrohet nga gjyqtarët dhe prokurorët që nuk zbatojnë ligjin.
Duke u shprehur ngushëllimet familjarëve të viktimës, Gjonaj angazhohet për realizimin sa më parë të reformës në drejtësi.
Reagimi i zv/ministres së Drejtësisë Etilda Gjonaj:
Ngjarja e sotshme ishte tragjike, jo vetëm për humbjen e një gruaje profesioniste të mirë, e nënë të përkushtuar, por edhe pasi sërish doli në pah sistemi i kalbur i drejtësisë që ka nevojë urgjente për reformën më të thellë të mundshme në drejtësi.
Autori i krimit makabër të sotshëm ishte ndaluar dy vite më parë nga policia. Krimi i sotshëm ishte shmangur para dy vitesh. Por ç’bëri sistemi gjyqësor? Për veprën penale të armëmbajtjes pa leje që parashikon dënimin deri në 7 vjet burgim dhe veprës penale të dhunës në familje deri në 5 vjet burg, gjyqtarët e dënuan autorin vetëm me 3 vjet burgim në total.
E më pas ai që sot i mori jetën, Fadil Kasemi, u amnistua. Një vendim skandaloz i gjyqtarëve në 2016, sot i mori jetën një kolegeje të tyre.
Ngjarja e sotshme ishte një goditje e rëndë për të gjitha ne gratë me pozitë apo pa pozitë, dhe tregoi edhe njëherë për mosfunksionimin e sistemit të drejtësisë, që kërkon në mënyrë imediate pastrimin nga gjyqtarë dhe prokurorë që keqzbatojnë ligjin.
Duke ngushëlluar familjen e Fildeze Hafizi, i siguroj ata dhe mbarë opinionin publik për angazhimin maksimal të Qeverisë së re, në jetësimin sa më shpejt e me thellësinë e kërkuar të Reformës në Drejtësi. I bëj thirrje organit të akuzës për një hetim të gjithanshëm dhe sa më profesional të ngjarjes së rëndë!
U prehsh në paqe, mikja dhe kolegia jonë e dashur!
Ky mesazh jo vetëm si zv. Ministre e Drejtësisë, por edhe si grua dhe si nënë.
Etilda Gjonaj (Saliu)
Ne rradhe te pare te zbatohen ligjet dhe se dyti te repunohen ato ligje qe mendojet se duhen pershtaten psikologjise shqipetare ne drejtim te civilizimit saj duke ashpersuar ato atje ku dhuna ne familje te jete e patolerueshme ne cfaredo shkalle qofte.